Abasirikare babiri ba Israel baregwa kuba intasi za Iran batawe muri yombi

Igisirikare cya Israel cyatangaje ko abasirikare babiri bo mu Ngabo zirwanira mu kirere bahamwe n’ibyaha byo kuba intasi za Iran. Aba basirikare bakoraga nk’abatekinisiye b’indege zo mu bwoko bwa F-15 ku kibuga cy’indege cya Tel Nof Airbase.

Baregwa gutatira umwanzi bakamuha amakuru ajyanye n’indege z’intambara za Israel, amakuru ku bibuga by’indege za gisirikare n’ikoranabuhanga. Bivugwa kandi ko bakoranaga n’intasi z’umwanzi bagamije guha Iran ibanga rya gisirikare.

Inzego z’umutekano za Israel zirimo Igisirikare n’Urwego rw’Igihugu Rushinzwe Umutekano zatangaje ko abo ba tekinisiye bemeye ko bakoranaga n’intasi za Iran bagamije inyungu z’amafaranga, gusa nyuma bakaza kubihagarika. Bati “Bakomeje kuvugana n’inzego z’ubutasi za Iran kandi bakora imirimo itandukanye bayobowe na zo, babigurana amafaranga.”

Inyandiko z’urubanza zivuga ko umwe muri bo yahaye intasi ya Iran ibikoresho n’inyandiko yakuye mu myitozo ye ya gisirikare bijyanye n’imikorere y’indege z’intambara. Yatanze kandi inyandiko zerekana inyubako n’ahantu hatandukanye hari ibikorwa bya gisirikare.

Ibi byaha byerekana ko ubutasi hagati ya Israel na Iran bwageze ku rwego rwo hejuru, buri gihugu gishaka amakuru y’ukuri ku ikoranabuhanga mu ikoreshwa ry’intwaro no ku bikorwaremezo bya gisirikare by’ikindi gihugu.

Kuba abasirikare bakorera mu gisirikare cy’ikirere cya Israel barafatwa nk’intasi ni ikibazo gikomeye ku mutekano w’igihugu. Tel Nof Airbase ni kimwe mu bibuga by’ingenzi bifitwe na Israel mu kurinda ikirere cyayo no kugaba ibitero.

Ubuyobozi bwa gisirikare bwa Israel buvuga ko iri perereza ryerekanye ko imikoranire n’umwanzi yahagaritswe ku gihe, kandi ko ingamba zikarishye zizakomeza gushyirwa mu bikorwa kugira ngo hatabaho ibitero by’imbere mu gisirikare.

In English

Two Israeli soldiers accused of being Iranian spies

The Israeli military announced that two Air Force soldiers have been convicted of espionage for Iran. The soldiers worked as F-15 aircraft technicians at Tel Nof Airbase.

They are accused of spying for the enemy and providing information about Israeli warplanes, military airfields and technology. They are also said to have collaborated with enemy spies with the aim of providing military secrets to Iran.

Israeli security agencies, including the military and the National Security Agency, said the technicians admitted to working with Iranian spies for financial gain, but later stopped doing so. They said, “They continued to communicate with Iranian intelligence and carried out various tasks under their direction, in exchange for money.”

The court documents state that one of them gave an Iranian spy equipment and documents he had obtained from his military training on the operation of fighter jets. He also provided documents showing various buildings and locations where military operations were taking place.

These crimes show that espionage between Israel and Iran has reached a high level, with each country seeking accurate information on the other's weapons technology and military infrastructure.

The fact that soldiers serving in the Israeli Air Force are considered spies is a serious threat to national security. Tel Nof Airbase is one of Israel's most important air bases for protecting its airspace and conducting strikes.

The Israeli military leadership says that this investigation has shown that the interaction with the enemy was stopped in time, and that strict measures will continue to be implemented to prevent internal attacks within the military.