Mali u mutekano muke, perezida w'iki gihugu Goïta yahungishijwe, Minisitiri w’Ingabo yishwe

Ibikorwa remezo byatwitswe

Ibitero by’imitwe y’inyeshyamba byibasiye Mali

Ibintu bikomeje kudogera muri Mali nyuma y’uko imitwe yitwaje intwaro igabye ibitero by’ibihumbi mu bice bitandukanye by’igihugu, birimo n’Umurwa Mukuru Bamako. Igisirikare cya Mali cyatangaje mu ijoro ryo ku wa 25 Mata 2026 ko ibitero byo kwirukana aba barwanyi byari bikomeje, ndetse bamwe bahise bahunga. Imirwano yumvikanye cyane i Kati, ahakomoka abasirikare benshi, no muri Gao, Sevare na Mopti.

Gen Camara wishwe Tariki ya 26 mata 2026

Aljazeera yatangaje ku wa 26 Mata 2026 ko Minisitiri w’Ingabo wa Mali, Gen Sadio Camara, yiciwe ku rugo rwe i Kati nyuma y’ibitero byinshi byagabwe n’abarwanyi ba al Qaeda n’aba Tuareg kuva ku wa Gatandatu. Camara yari umwe mu basirikare bakomeye bagize uruhare mu guhirika ubutegetsi bwa Perezida Ibrahim Boubacar Keïta mu coup d’état za 2020 na 2021, akaba yarabaye igikomangoma mu butegetsi bwa gisirikare bwa Perezida Assimi Goïta.

Amakuru agezweho ni uko Perezida Assimi Goïta yamaze guhungishirizwa mu kigo cy’ingabo zidasanzwe za Mali, mu gihe urusaku rw’amasasu rukomeje kumvikana no muri Kidal ku wa 26 Mata 2026. Ibi bitero bigaragaza ko umutekano wa Mali ukomeje kuba muke cyane nubwo ubutegetsi bwa gisirikare bwatangaje ko bugamije gucunga igihugu.

Abarwanyi b’umutwe wa Azawad Liberation Front (ALF), ushaka ubwigenge bw’Abatuareg, bibasiye imijyi yo mu majyaruguru nka Kidal. Ku rundi ruhande, umutwe wa kiyisilamu ,Jama’at Nusrat al-Islam wal-Muslimin (JNIM) ushamikiye kuri al Qaeda wagabye ibitero ahandi hose mu gihugu. Ibi byongereye ubwoba mu baturage no mu nzego z’ubutegetsi.

Mali imaze igihe kinini ihanganye n’imitwe y’inyeshyamba yo mu Burengerazuba bwa Afurika, irimo al Qaeda na Islamic State mu karere ka Sahel. Ubutegetsi bwa gisirikare bwatandukanye n’u Bufaransa n’umuryango wa ECOWAS kuva 2020, maze bugirana ubufatanye bwa gisirikare n’u Burusiya binyuze mu itsinda rya Wagner. Ibi byagize uruhare mu gukaza amakimbirane ndetse no gutuma amasezerano y’amahoro ya 2015 n’aba Tuareg asenyuka kuva 2023.

Urupfu rwa Gen Camara rushobora guhungabanya imiyoborere y’ingabo za Mali, kuko yari umwe mu nkingi zikomeye z’ubutegetsi. Abasesenguzi bavuga ko ibi bitero bishobora kuba intangiriro yo kugenzura ibice bitandukanye by’igihugu, bikongera ubuhungiro bw’abaturage n’umubare w’impunzi. Ibi kandi bitiza umurindi ikibazo cya politiki muri Mali, aho ubutegetsi bwa gisirikare bwari bwarasezeranyije gusubiza ubutegetsi abasivile ariko bikaba bitaragerwaho.

In English