FRN: Umutwe mushya wa Politiki n'Igisirikare ushinzwe na Joseph Kabila n'abayobozi ba AFC/M23 muri RDC
FRN: Umutwe mushya wa Politiki n'Igisirikare ushinzwe na Joseph Kabila n'abayobozi ba AFC/M23 muri RDC Ku mugoroba wo ku wa 12 Ukwakira 2026, isura nshya ya politiki yagaragaye mu Burasirazuba bwa Repubulika Iharanira…
NSANZIMANA SylverOct 17, 20264 min read
Share
FRN: Umutwe mushya wa Politiki n'Igisirikare ushinzwe na Joseph Kabila n'abayobozi ba AFC/M23 muri RDC
Ku mugoroba wo ku wa 12 Ukwakira 2026, isura nshya ya politiki yagaragaye mu Burasirazuba bwa Repubulika Iharanira Demokarasi ya Congo. Joseph Kabila Kabange, wahoze ayobora icyo gihugu, Corneille Nangaa Yobeluo, Bertrand Bisimwa, Gen Maj Sultani Makenga n'abandi bafatanyabikorwa babo bashinze umutwe mushya uhuriwemo politiki n'igisirikare, ugamije guhindura imiterere y'ubutegetsi buriho i Kinshasa.
Uyu mutwe mushya witwa FRN, bisobanuye Front pour la Refondation de la Nation, cyangwa Umutwe wo Kongera Kubaka Igihugu. Washinzwe nyuma y'inama yahuje impande zose i Goma kuva ku itariki ya 10 kugeza ku ya 12 Ukwakira 2026, yitabirwa n'itsinda rya Kabila, abayobozi bakuru ba AFC/M23 na MRDP Twirwaneho.
Itangazo ryo kuwushinga rivuga ko FRN isimbuye burundu AFC (Alliance Fleuve Congo) yari imaze imyaka hafi itatu ibaho, yari iyobowe na Corneille Nangaa, wabaye Perezida wa Komisiyo y'Amatora ya RDC (CENI) kuva 2015 kugeza 2021.
Joseph Kabila, wayoboye RDC kuva mu 2001 kugeza 2019, yagizwe Perezida wa FRN hashingiwe ku bwumvikane bw'abawushinze. Kabila asanzwe aba mu bice bigenzurwa na AFC/M23 kuva muri Gicurasi 2025, nyuma yo kuva mu buhungiro bw'imyaka myinshi.
Ubuyobozi bwe bushya buje nyuma y'igihe agaragaza ko atemeranya n'imiyoborere ya Perezida Félix Tshisekedi, amushinja kuyobora igihugu mu buryo bw'igitugu, gutsikamira abatavuga rumwe na we no gushyira imbere intambara aho gushyira imbere ibiganiro.
Mu butumwa bwo ku wa 23 Gicurasi 2025, Kabila yavuze ko yasigiye Tshisekedi igihugu kiri ku murongo, ariko ko ubukungu, imibereho y'abaturage n'umutekano byose byazambye. Ku wa 9 Ukwakira 2026, yongeyeho ati "Congo iri mu kaga. Kuyirokora ni inshingano y'ingenzi kandi yihutirwa."
Abasesengura bavuga ko Kabila atagarutse nk'umunyapolitiki w'opozisiyo usanzwe. Ni umusirikare ufite ipeti rya Général Major, kandi ubwe yabyivugiye muri Gicurasi 2025 ati "Nk'umusirikare, narahiriye kurwanira igihugu kugeza ku gitambo kiruta ibindi. Haba ndi ku butegetsi cyangwa ntariho, ndacyashimangira iyi ndahiro."
Corneille Nangaa Yobeluo wayoboraga AFC, Bertrand Bisimwa wayoboraga M23/ARC na Gen Maj Sultani Makenga wari Umugaba Mukuru wa ARC (igisirikare cya M23) bagizwe ba Visi Perezida ba FRN.
Ishami rya gisirikare rya FRN, nubwo izina ryarwo ritaramenyekana neza, bivugwa ko rizaba rigizwe n'abasirikare bakomeye bari basanzwe muri AFC/M23 na MRDP Twirwaneho. Gen. Maj. Sultani Makenga ni we Mugaba Mukuru w'ishami rya gisirikare rya FRN.
Ku rwego rw'ubunyamabanga, Prof. Freddy Kaniki Rukema, Perezida wa MRDP Twirwaneho akaba n'umwe mu bayobozi bungirije ba AFC/M23, yagizwe Umunyamabanga Mukuru wa FRN akaba n'Umuhuzabikorwa wa Komite Nshingwabikorwa. Azungirizwa na Benjamin Mbonimpa, wari Umunyamabanga Uhoraho wa AFC/M23.
Désiré Rukomera Rwigema yagizwe Umunyamabanga Uhoraho w'Inama y'Abashinze FRN. Iri tangazo rivuga ko izi nshingano zatanzwe ku bwumvikane, mu gihe hagitegerejwe ko inzego zose za FRN zishyirwaho mu buryo bwuzuye.
Mu ngingo ya 9 n'iya 11 z'itangazo, FRN ivuga ko intego yayo atari ugushaka umwanya mu butegetsi buriho, ahubwo ari uguhuriza hamwe imbaraga zose zirwanya Leta ya Kinshasa kugira ngo ihagarike ubutegetsi bw'igitugu. Ingingo ya 11 ivuga ko ishingwa rya FRN ryashyize akadomo kuri AFC, ariko ntiharamenyekana niba M23 na yo yavuyeho.
Me Moïse Nyarugabo, wari witabiriye ishingwa rya FRN akaba ari mu bantu ba hafi ba Kabila, yahaye Tshisekedi ubutumwa bukomeye ati "Niba ashaka amahoro, twiteguye kuyamuha, natwe akayaduha. Ariko niba ashaka intambara, azayibona. Turiteguye kandi ingamba zose za ngombwa zarafashwe."
Uku gushingwa kwa FRN kubaye mu gihe Repubulika Iharanira Demokarasi ya Congo iri mu bihe bikomeye. Mu Burasirazuba, intambara irakomeje nubwo hari ibiganiro by'amahoro bya Washington na Doha. Raporo ya Loni iheruka yagaragaje ko abarenga miliyoni 6,1 ari impunzi imbere mu gihugu, ndetse abandi miliyoni 1,3 bari mu mahanga nk'impunzi.
Ku bijyanye n'umutekano, imirwano iheruka kubera muri Masisi, Minembwe na Goma nubwo hari intumwa z'Umuryango wa Afurika Yunze Ubumwe (AU) ziyobowe na ba Perezida ba cyera barimo Uhuru Kenyatta zari i Goma ku wa 6 Ukwakira 2026 zishaka gushyira mu bikorwa amasezerano ya Washington. AFC/M23 yatangaje ko ingabo za Leta zongereye ibitero bya drone muri Minembwe ku wa 9 na 10 Ukwakira.
Ikibazo cy'ubutabazi nacyo gikomeye. Ituri na Kivu y'Amajyaruguru harimo icyorezo cya Ebola cy'ubwoko bwa Bundibugyo cyatangajwe muri Gicurasi 2026, cyamaze kwica abantu hafi 3900. Impunzi ibihumbi 19 zari mu nkambi ya Kigonze muri Ituri zahunze nyuma y'imirwano, bituma gukurikirana abakekwaho kwandura bigorana.
Mu rwego rw'ubukungu n'imibereho, intambara yatumye ibiciro by'ibiribwa byiyongera, isoko rihungabana, abaturage benshi bakaba bari mu kaga k'inzara (IPC Phase 3 na 4). FRN ishinja ubutegetsi gukoresha nabi umutungo, ruswa, ivangura rishingiye ku moko ndetse no gukoresha imitwe nka FDLR. Iravuga ko ishaka kubaka igihugu gifite ubutabera, ubwiyunge, gusaranganya umutungo no guha intara ubwigenge, ariko abasesenguzi bavuga ko kuzuza izo ntego bizasaba amahoro arambye ataraboneka.
Tuganire newsroom
Related articles
Related articles
Share articles
NSANZIMANA Sylver
Author
