ABA jenerari bakomeye Wei Fenghe na Li Shangfu bakatiwe igihano cy'urupfu rusubikiwe mu myaka 2 bazira ruswa mu Bushinwa

Ku wa Kane tariki ya 7 Gicurasi 2026, Urukiko Rukuru rwa Gisirikare mu Bushinwa rwatangaje ko Wei Fenghe na Li Shangfu, bombi bari barayoboye Minisiteri y’Ingabo, bakatiwe igihano cy’urupfu gisubikiwe mu myaka ibiri. Bahamwa n’ibyaha byo kwakira no gutanga ruswa ndetse no kutuzuza inshingano za kiyobozi mu gihe bari ku butegetsi.

Mu mategeko y’u Bushinwa, igihano cy’urupfu gisubikiwe mu myaka ibiri bivuze ko uwo ukatiwe adahita yicwa. Ahubwa imyaka ibiri yo kugororerwa muri gereza, niba muri icyo gihe agaragaje imyitwarire myiza, ntagatoroke kandi akora imirimo ngoramuco, igihano cy’urupfu gihindurwa igifungo cya burundu. Imitungo yabo yose nayo yafatiriwe kandi bamburwa uburenganzira bwo kugira uruhare muri politiki.

Wei Fenghe yayoboye Minisiteri y’Ingabo kuva mu 2018 kugeza mu 2023, asimburwa na Li Shangfu nawe wakuwe kuri uwo mwanya atamaze kabiri. Bombi bari mu nzego zo hejuru z’umutekano w’u Bushinwa kandi bari bafite ijambo rikomeye mu buyobozi bwa gisirikare. Ibi bituma urubanza rwabo ruba kimwe mu bibayeho bidakunze kubaho ku bayobozi b’igisirikare bo ku rwego rwo hejuru.

Amakuru y’ifungwa ry’aba bagabo yakangaranyije igihugu, kugeza ubwo Perezida Xi Jinping ubwe yavugiye mu ruhame ko bafunzwe bazira ibyaha bya ruswa. Ibi biri mu murongo wa politiki ya Xi yo kurwanya ruswa mu nzego zose za Leta n’igisirikare, imaze imyaka irenga 10 ikora ibikorwa byo guhana abayobozi bakuru batari bake, harimo n’abari mu Biro Politiki by’ishyaka riri ku butegetsi.

Mu Bushinwa, ruswa mu gisirikare ifatwa nk’ikibazo cy’umutekano w’igihugu kuko ishobora kunaniza ubushobozi bwo kurwana no kugabanya icyizere cy’abaturage ku ngabo. Xi Jinping akenshi agaragaza ko igisirikare kigomba kuba “kizima, gisobanutse kandi cyizewe”, bityo guhana abayobozi bakuru bikaba ubutumwa bukomeye ku bandi bayobozi bose.

Iki kiburanisho kigaragaza ko ntawe urengeye amategeko mu Bushinwa, kabone n’iyo yaba yarigeze kuba umuyobozi ukomeye wa gisirikare. Abasesenguzi bavuga ko ibi bigamije kugarura isuku no kongera icyizere cy’abaturage ku gisirikare, ariko nanone bikagaragaza intambara y’imbere mu ishyaka rya Communist Party hagati y’abashyigikiye Xi n’abandi bayobozi bakomeye.

U Bushinwa bukunze gukoresha igihano cy’urupfu gisubikiwe mu myaka ibiri nk’uburyo bwo kugenzura imyitwarire y’abakatiwe no kugabanya urupfu nyarwo. Ibi bitandukanye n’ibihano byo kwicwa ako kanya bikoreshwa ku byaha bikomeye cyane nk’ubugambanyi cyangwa ubutekamutwe. Uru rubanza kandi rushimangira ko igisirikare cy’u Bushinwa kiri mu mpinduka zikomeye mu miyoborere n’imicungire y’imari kuva Xi Jinping yafata ubutegetsi mu 2012.

ABA jenerari bakomeye Wei Fenghe na Li Shangfu bakatiwe igihano cy'urupfu rusubikiwe mu myaka 2 bazira ruswa mu Bushinwa