Abarundi babiri barashwe bashinjwa ubucuruzi bwa magendu ku mupaka w’u Rwanda

Ku wa 29 Mata 2026, Polisi y’u Burundi yarashe Abarundi babiri bashinjwaga kugerageza kwinjiza ikawa mu Rwanda binyuze mu nzira zitemewe n’amategeko, bombi bahita bapfa. Mu gitondo cyo uwo munsi abapolisi bakorera i Mparamirundi, Komini Kayanza mu Ntara ya Butanyerera, hafi y’umupaka w’u Rwanda n’u Burundi, bafashe abantu bane bashinjwa ubucuruzi bwa magendu.

Aba bantu bari bafite ibilo hagati ya 40 na 60 by’ikawa, bikekwa ko bari bagamije kubyambutsa umupaka wari umaze imyaka ibiri ufunze. Abatawe muri yombi bajyanywe kuri sitasiyo ya Polisi ya Mparamirundi, ariko babiri muri bo baraswa bahasiga ubuzima, hashingiwe ku itegeko ry’umuyobozi wa sitasiyo uzwi nka Franck.

Urubuga SOS Medias rwatangaje ko hari amakuru ahamya ko ubuyobozi bwo ku rwego rwo hejuru bwo mu Burundi bwahaye abapolisi bakorera ku mupaka ibwiriza ryo kurasa abambutsa ibicuruzwa mu buryo bwa magendu. Ku rundi ruhande, Polisi y’u Burundi ivuga ko urusaku rw’amasasu rwumvikanye rwatewe n’abaturage bateye imvururu bashaka ko abantu babo bafungurwa, ariko ngo amasasu yarashwe mu kirere kugira ngo batuze.

Minisiteri y’Umutekano w’Imbere mu Burundi yahakanye amakuru avuga ko hari abaturage bishwe i Mparamirundi. Yemeje ko hari abafashwe bambukana ikawa mu buryo butemewe kandi ko bazagezwa mu rukiko. Yagize iti: “Nta muntu wishwe kuri zone Mparamirundi... Abafatanywe ikawa bazacirwa urubanza ako kanya.”

Nubwo Leta ihakana urupfu rw’aba baturage, andi makuru avuga ko abapolisi bamaze kubashyingura, ariko bahabwa ibwiriza ryo kuvuga ko batishwe, ahubwo bakiri muri kasho. Ibi byongeye gushyira ikibazo ku mutekano w’abaturage n’uburyo inzego z’umutekano zikemura ibibazo by’ubucuruzi bwa magendu ku mupaka.

Umupaka w’u Rwanda n’u Burundi umaze imyaka ibiri ufunze kuva 2024, nyuma y’umubano mubi hagati y’ibihugu byombi. Ibi byatumye ubucuruzi bwa magendu bwiyongera, cyane cyane mu bicuruzwa nk’ikawa, ibiribwa n’ibikoresho byo mu rugo. Abaturage bo ku mipaka bakunze kugerageza kwambutsa ibyo bicuruzwa nijoro kugira ngo birinde abapolisi.

Iki kibazo cyongeye kugaragaza ubukana bw’ubucuruzi bwa magendu n’ingaruka z’umutekano muke ku mipaka. Impuguke mu by’uburenganzira bwa muntu zivuga ko gukoresha imbaraga z’umurengera ku bacuruzi bato bishobora kongera umwuka mubi hagati y’ubuyobozi n’abaturage. Leta y’u Burundi isabwa gushyiraho uburyo bworoshye bwo guca imisoro ku bicuruzwa byambukiranya imipaka no gushyiraho inzego zigenzura zitabogamye, mu rwego rwo gukumira izindi mpanuka nk’izi.

Abarundi babiri barashwe bashinjwa ubucuruzi bwa magendu ku mupaka w’u Rwanda