Amerika imaze gutakaza indege z'intambara zirenga 40 ndetse nibindi bihenze cyane

Raporo nshya yatangajwe na Amerika yerekana ibyo Amerika imaze gutakaza mu bya gisirikare mu ntambara yo muri Iran, aho igaragaza ko indege z’intambara zirenga 40 zimaze kuhononekara cyangwa gusamburwa. Iyi raporo yashyizwe ahagaragara na Kongere mu rwego rwo gusobanura ingaruka z’imirwano ikomeye imaze igihe.

Raporo yakozwe na Kongere Research Service, CRS, ikaba ishingiye ku makuru atangwa na Pentagon, ikigo gishinzwe gisirikare cya Amerika, ku buyobozi bw’ingabo za Amerika bwa CENTCOM bushinzwe Akarere k’Uburasirazuba bwo Hagati, no ku makuru yatangajwe n’ibitangazamakuru byizewe. Ibi bituma iyi raporo ifatwa nk’ishingiro ryizewe ku byo Amerika imaze gutakaza.

Muri izo ndege zatakaye harimo ubwoko butandukanye, harimo indege z’intambara, za drone zitagira abapilote, za kajugujugu za gisirikare, ndetse n’indege zidasanzwe zikoreshwa mu bikorwa byihariye. Uku gutakaza kwerekana uburemere bw’imirwano n’uburyo ingabo za Iran zashoboye guhangana n’ikoranabuhanga rya Amerika.

Raporo ivuga ko igitero cya Amerika cyitwaga “Operation Epic Fury” cyateye impanuka ku ndege 42 za gisirikare. Muri zo harimo indege zo mu bwoko bwa F-15 na F-35 Lightning, kajugujugu z’ubutabazi zo mu bwoko bwa HH-60W Jolly Green II, n’izindi ndege zikoreshwa mu bikorwa bitandukanye bya gisirikare.

Abashyizeho iyi raporo basobanuye ko uru rutonde rushobora guhinduka kuko imirwano iracyakomeje, kandi kuko hari n’indege zishobora kugaragaramo ibyangiritse bishya mu gihe cyo gusuzuma. Ibi bivuze ko umubare w’ibyangiritse ushobora kuziyongera.

Byongeye kandi, raporo igaruka ku byo Jules W. Hurst III, umuyobozi wa Pentagon, yabwiye Kongere ku wa 12 z’uku kwezi. Yavuze ko amafaranga Amerika imaze gukoresha muri iyi ntambara ya Iran arenga miliyari 29 z’amadolari ya Amerika, ahanini akoreshwa mu gusana indege zangiritse n’ibindi bikoresho bya gisirikare.

Muri izo ndege zatakaye, raporo yibanze cyane ku ndege zo mu bwoko bwa F-15E Strike Eagle. Izo ndege zizwiho ubushobozi bwo kurasa kure no gutwara ibisasu byinshi, ariko zimwe muri zo zasenwe mu kirere cya Koweit n’ahandi hatangirijwe imirwano.

Raporo ivuga ko byibuze indege enye zo mu bwoko bwa F-15E Strike Eagle zimaze gutakara. Ibi bikaba ikimenyetso cy’uko intambara yo muri Iran yagize ingaruka zikomeye ku ngabo za Amerika, kandi ikaba ishobora guhindura imyanzuro ya Washington ku buryo ikomeza uruhare rwayo mu karere.

Amerika imaze gutakaza indege z'intambara zirenga 40 ndetse nibindi bihenze cyane