Perezida Ruto yongereye imishahara y’abakozi ba Leta muri Kenya

Ku wa 1 Gicurasi 2026, Perezida wa Kenya, Dr. William Samoei Ruto, yatangaje ko umushahara w’abakozi ba Leta bose uziyongeraho 12%, mu gihe uw’abakora mu rwego rw’ubuhinzi n’ubworozi uziyongeraho 15%. Yabitangaje ubwo Abanyakenya bizihizaga umunsi mpuzamahanga w’umurimo, avuga ko ari igikorwa cyo kubafasha guhangana n’izamuka ry’ibiciro biri guhungabanya imibereho yabo.

Ruto yasobanuye ko urwego rw’ubuhinzi n’ubworozi rwatangiwe umushahara mwinshi kuko ari urufatiro rukomeye rw’ubukungu bwa Kenya, rukemura ikibazo cy’inzara kandi rugaha akazi abaturage benshi. Avuga ko gushyigikira abahinzi n’aborozi ari inzira yo gushimangira umutekano w’ibiribwa no kugabanya ubushomeri mu byaro, cyane ko uru rwego rubarizwamo hejuru ya 70% by’abakora muri Kenya.

Perezida Ruto yanagaragaje ko Leta yafashe icyemezo cyo kuvugurura urwego rw’igihugu rushinzwe ubwiteganyirize (RHA) kugira ngo ruzarusheho gusubiza ibibazo by’abakozi. Ibi biri mu gahunda yo kunoza serivisi z’imibereho myiza y’abakozi no kubafasha kugira ubwishingizi bwizewe mu gihe cy’izabukuru n’indwara, hagamijwe kugabanya umutwaro w’abakozi bo mu rwego rwo hasi.

Abarimu bo muri Kenya bari bemerewe kwivuriza mu bitaro 900 gusa ku kiguzi gito. Ubu Ruto yatangaje ko bazajya bivuriza mu bitaro birenga 9000, harimo ibitaro byose byo ku rwego rwa 6, bivuye ku mubare muto wari usanzwe. Iki ni intambwe ikomeye mu kunoza serivisi z’ubuzima ku barimu, bikaba bishobora no gutuma imikorere yabo irushaho kuba myiza.

Iki cyemezo cyaje mu gihe Abanyakenya bari baratakambiye kubera izamuka ry’ibiciro by’ibikomoka kuri peteroli, ryatewe n’intambara ya Leta Zunze Ubumwe za Amerika na Iran yahungabanyije ingendo z’ubwato mu Muyoboro wa Hormuz. Abaturage bari basabye Leta kongera imishahara cyangwa gufasha mu korohereza imibereho kugira ngo amafaranga binjiza adashirira mu biciro by’ibanze nka lisansi, ibiribwa n’ubwikorezi.

Kongera imishahara bizafasha abakozi guhangana n’izamuka ry’ibiciro, ariko bishobora no kongera umutwaro ku ngengo y’imari ya Leta. Abasesenguzi bavuga ko Leta igomba gushaka uburyo bwo kongera umusaruro w’ubukungu no kugabanya ibijyanye n’imyenda kugira ngo iki cyemezo kidatera izindi ngaruka ku ifaranga rya Kenya. Ni nako byagenze mu 2023 ubwo Ruto yongereye imisoro kugira ngo abone amafaranga yo gushyigikira imishinga y’iterambere.

Byitezwe ko urwego rushinzwe abakozi n’umurimo ruzatangaza amakuru arambuye ku cyemezo cyo kongera imishahara, harimo n’igihe kizatangira gushyirwa mu bikorwa. Iki gikorwa gishobora kugira ingaruka nziza ku mibereho y’abakozi, ariko gikeneye gukurikiranwa hafi kugira ngo kigerweho nta mbogamizi z’ubukungu.

Perezida Ruto yongereye imishahara y’abakozi ba Leta muri Kenya